Британските безбедносни власти се обидуваат да изнајдат вистинско решение за тоа како да се одговори на безбедносната закана за земјата, по терористичките напади во Париз, па денеска во Лондон се одржува втора седница на специјалната Комисија за вонредни ситуации КОБРА.
На вчерашната седница, со која раководеше премиерот Дејвид Камерон одлучено е да се задржи досегашното ниво на тревога од втор степен, според која, терористички напад во Британија е „мошне веројатен“.
Камерон подоцна изјави дека ваквото решене не значи дека тоа не може да биде повторно преразгледано.
Засега е одлучено само да се зголеми бројот на полициските сили на британските пристаништа, како и да се засили бројот на полицајците на јавните места и на јавните настани.
Во Лондон е потврдено дека меѓу убиените во Париз има и еден млад Британец кој работел како продавач во концертната сала Батаклан.
Сведоци изјавија за лондонските медиуми дека во салата во која имало 1.500 луѓе, сите тинејџери и млади во своите рани дваесети години, имало и други Британци.