Израелскиот министер за правда Јарив Левин денес, за време на состанокот со водачот на еврејските доселеници и раководител на Регионалниот совет на Самарија, Јоси Даган, изјави дека е време за анектирање на Западниот Брег.
„Мислам дека овој период, покрај актуелните прашања, е историска можност што не смееме да ја пропуштиме. Дојде време за суверенитет, време за спроведување на суверенитетот. Мојот став по ова прашање е цврст и јасен“, рече Левин во врска со анексијата на Западниот Брег, објавува „Тајмс оф Израел“.
Израел го зазеде Западниот Брег во 1967 година за време на Шестдневната војна, но никогаш формално не го анектираше, иако јасно ги изрази своите аспирации да го стори тоа во 2020 година.
Иако Израел се откажа од идејата во замена за нормализирање на односите со Обединетите Арапски Емирати, Левин денес изјави дека прашањето мора да биде „на врвот на листата со приоритети“.