Шефот на Агенцијата на ОН за помош и работа за палестинските бегалци на Блискиот Исток (UNRWA), Филип Лазарини, денес го повика Израел да им дозволи пристап на меѓународните новинари во Газа, велејќи дека забраната за медиуми е забрана за вистината.
„Ова е без преседан во кој било друг конфликт во модерната историја. Тоа е забрана за вистината. Тоа е забрана за известување за факти. Тоа е совршен рецепт за поттикнување дезинформации, продлабочување на поларизацијата и дехуманизацијата“, изјави Лазарини за мрежата X.
Тој потсети дека израелските власти им забранија на меѓународните новинари да влезат во Газа кога започна војната пред 20 месеци, нагласувајќи дека е потребно овие новинари да им обезбедат помош на палестинските колеги на терен, „кои херојски ја вршат својата работа по висока цена“.