Министерот за надворешни работи на Русија Сергеј Лавров изјави денеска дека со претседателот на САД Доналд Трамп не зборувал за разрешувањето на поранешниот директор на ФБИ Џејмс Коми.
Минатата недела Трамп објави дека го разрешува Коми од функцијата директор на Федералното истражно биро (ФБИ).
– Воопшто не зборувавме на тие теми, нагласи Лавров.
„Њујорк тајмс“ вчера објави дека, Трамп за време на минатонеделната средба со Лавров во Вашингтон навел дека со разрешувањето на Коми „го отстранил големиот притисок“ со кој се соочил во врска со актуелната истрага за врските на членови на неговиот изборен штаб со Русија пред ланските претседателски избори.
Весникот, ваквото тврдење го базира на документ со прибелешки од разговорите, кој наводно на весникот му го доставил „неименуван американски висок претставник“.
– Само што го отпуштив шефот на ФБИ. Беше луд, вистински лудак. Се соочив со голем притисок поради Русија. Тоа сега е отстрането, наводно изјавил Трамп во разговорот со Лавров.