Русија ја поздравува позицијата на американскиот претседател Доналд Трамп дека приближувањето на Украина со НАТО претставува проблем за Москва, изјави денеска рускиот министер за надворешни работи Сергеј Лавров.
„Во еден од неговите први говори, претседателот Трамп, критикувајќи ја позицијата на администрацијата (поранешниот американски претседател Џо) Бајден за украинската криза, отворено рече дека една од главните грешки е вовлекувањето на Украина во НАТО“, рече Лавров.
Лавров истакна дека ова е првпат „проблемот на НАТО“ да биде нешто за кое САД се подготвени да разговараат, пренесува РИА Новости.
Трамп во јануари рече дека ја разбира позицијата на Русија дека Украина не треба да биде дел од НАТО и го обвини Бајден за наводно менување на американската позиција за членството на Украина во НАТО.