Рускиот министер за надворешни работи Сергеј Лавров и американскиот државен секретар Марко Рубио денеска телефонски разговараа за подготовките за средба меѓу рускиот претседател Владимир Путин и американскиот претседател Доналд Трамп, соопшти руското Министерство за надворешни работи.
„Се договоривме за редовни контакти, вклучително и подготовка на средбата Путин-Трамп“, ја пренесе ТАСС изјавата на Лавров.
Разговорот меѓу шефовите на дипломатиите на Русија и САД се одржа на иницијатива на американската страна.
Блумберг наведува дека средбата меѓу двацата престедатели ќе се одржи пред 28 февруари.
Новинската агенција јавува дека претставници од двете страни ќе се сретнат следната недела за да го подготват теренот. Политико, од своја страна, претходно објави дека највисоките претставници на администрацијата на Трамп ќе започнат мировни преговори со руски и украински преговарачи во Саудиска Арабија во наредните денови.
Американскиот советник за национална безбедност Мајк Волц, државниот секретар Марко Рубио и специјалниот пратеник на американскиот претседател за Блискиот Исток Стив Виткоф ќе отпатуваат во Саудиска Арабија, забележува изданието. Меѓутоа, на овие разговори нема да присуствува специјалниот претставник на САД за Украина, Кејт Келог.
Телефонскиот разговор на Трамп со Путин во средата, во кој тие разговараа за сè и – очигледно и главно – за Украина, се чини дека го забрза развојот на настаните. Следеа изјавите на Зеленски дека со Путин ќе разговара само врз основа на план што ќе го договори со САД, како и најавите од САД дека Европа ќе има мислење, но не и присуство во разговорите за Украина.
За нешто повеќе од две недели, двајцата лидери ќе зборуваат лице в лице. Се чека и ветување од двајцата лидери за размена на посети.