Курдските борци успеаја да го запрат напредувањето на џихадистите од групата Исламска држава (ИД) во сирискиот град Кобане, што се наоѓа во близна на границата меѓу Сирија и Турција, соопшти денеска Сирискиот центар за мониторинг на човековите права.
Во соопштението на Центарот се наведува дека џихадистите од петокот го запреле напредувањето во Кобане и дека во реонот почнало да им пристигнува засилување.
Курдскиот активист од Кобане, Фархад Шами го информирал Центарот дека состојбата во градот е „релативно мирна“, освен што повремено се слушале снајперски истрели.
Според него, припадниците на ИД вчера започнале офанзива јужно од Кобане, но нивниот напад бил одбиен и претрпиле големи загуби.
Директорот на Сирискиот центар, Рами Абдурахман информира дека во судирите околу Кобане вчера загинале 36 џихадисти, додавајќи дека ИД и натаму контролира една третина од градот.