Портпаролот на Кремљ, Дмитриј Песков денеска ги коментираше тврдењата на Доналд Трамп дека може брзо да го реши конфликтот во Украина, но додаде дека е подобро новата администрација да бара мир наместо продолжување на војната.
„Се разбира, беше малку претерување дека тој ќе може да го направи тоа преку ноќ. Нема ништо што може веднаш да го реши овој проблем“, рече Песков.
Но, барем новата администрација ќе бара мир, а не продолжување на војната, што е чекор на подобро, рече Песков.
Песков, исто така, истакна дека односите меѓу САД и Русија остануваат лоши, нарекувајќи ги Соединетите држави „непријателска земја која директно и индиректно е вклучена во војна против руската држава“.
Трамп во неколку наврати изјави дека ќе разговара со Владимир Путин и ќе го прекине конфликтот во Украина во рок од 24 часа, но не го кажа деталниот план.
Многумина стравуваат дека тоа би значело дека Украина мора да ја предаде окупираната територија на Русите.