Кремљ го одби барањето на американскиот претседател Џо Бајден за итно ослободување на рускиот дисидент Алексеј Навални, јави ДПА.
– Ултиматумите се генерално неприфатливи, изјави денеска во Москва портпаролот Дмитриј Песков. – Веќе рековме дека ќе ги игнорираме ваквите предавања, дополни Песков.
Бајден, претходно, во својот прв голем говор во надворешната политика, повика водечката опозициска личност во Русија да биде ослободена.
Во вторникот, Суд во Москва го осуди на затвор 44-годишнииот опозиционер, поради прекршување на условната казна додека бил во Германија на лекување по обидот да биде отруен со нервен агенс.
По изрекувањето на затворската казна, масовни протести избија во Русија, а илјадници демонстранти се приведени.
Бајден рече дека напорите на Москва за поткопување на слободата на изразување и собири предизвикуваат голема загриженост.
Говорот на Бајден беше обележан со „многу агресивна и неконструктивна реторика“, оцени портпаролот на Кремљ.
И покрај „многуте разлики во мислењата и различните пристапи за клучните прашања“, Москва се надева дека ќе има „основа за разговори“, рече Песков.