Конгресниот комитет кој го истражуваше минатогодишниот упад во американскиот Капитол денеска издаде препорака за поднесување кривична пријава против поранешниот претседател Доналд Трамп.
Телото едногласно побара од Министерството за правда да го гони Трамп, заради постоење основани сомненија дека сторил неколку кривични дела – поттикнување бунт, попречување официјална постапка, заговор за измама и давање лажни изјави.
-Комитетот обезбеди значајни докази дека претседателот Трамп имал намера да ја наруши мирната транзиција на власта според нашиот Устав, рече претставникот Џејми Раскин додека ги изложуваше наодите на панелот.
-Веруваме дека доказите опишани од моите колеги денеска и собрани во текот на нашите сослушувања, гарантираат кривично гонење на поранешниот претседател Доналд Џеј Трамп, рече Раскин.
Извор: МИА