Премиерот на Украина Денис Шмихал изјави дека украинската влада ќе ги искористи средствата запленети од две руски банки, „МР банка“ и „Промнивестбанка“, за обнова на земјата, а се работи за околу 460 милиони долари.
Средствата се додадени во државниот буџет по ликвидацијата на банките на 25 февруари минатата година, ден по рускиот напад врз Украина, објави Киев Индипендент.
На почетокот на декември Светска банка процени дека обновата на Украина ќе чини околу 600 милијарди евра. Во декември 2022 година, американскиот Сенат ги одобри средствата запленети во САД од руските олигарси – да бидат испратени до народот на Украина.
Украинскиот јавен обвинител, Андриј Костин, во февруари изјави дека САД го одобриле првиот трансфер на запленети средства во вредност од 5,4 милиони долари за обнова на Украина.