Русија бара компензација од Норвешка за избеганите ирваси, кои сега пасат на руските пасишта.
Имено, овие две земји имаат заедничка граница на Арктикот. И додека постои ограда што ги спречува ирвасите да ги преминат границите, таа бариера датира од 1954 година, со делови во лоша состојба, соопшти минатиот четврток Норвешката управа за земјоделство.
Распаднатата ограда им овозможи на 42 ирваси да преминат во Русија оваа година, во потрага по подобри пасишта во рускиот национален парк Пасвик Заповедник.
Русија веќе испратила две барања за компензација до Норвешка за избеганите ирваси.
Едно барање вклучува исплата од околу 50.000 круни, или 4.700 долари, за секој ирвас што преминал во Русија.
Второто барање е поврзано со паушал од речиси 47 милиони круни или 4,4 милиони долари. Второто барање се пресметува врз основа на вкупниот број денови што ирвасите ги поминале на пасење во рускиот национален парк.
Норвешката земјоделска управа планира да се сретне со водачите на рускиот национален парк за да разговара за компензацијата, а властите рекоа дека 40 од 42 ирваси кои влегле во Русија биле вратени и заклани поради страв дека повторно ќе преминат таму.
Во меѓувреме, Норвешкиот одбор за земјоделство ги потсети луѓето да ги држат под контрола нивните ирваси, кои ги чуваат номадските народи во Норвешка.
„Строго е забрането минување на границата со Русија, дури и за ирваси“, соопшти минатиот четврток Норвешката Дирекција за земјоделство, а пренесе АФП.
Нордиската земја поправа и дел од оградата по цена од 3,7 милиони круни. Се очекува поправките да завршат до 1 октомври.