Британскиот премиер Дејвид Камерон и германската канцеларка Ангела Меркел вчера во телефонски разговор се согласија дека е неопходна поинтензивна работа за да се постигне договор за реформирање на односите меѓу Велика Британија и ЕУ.
Камерон се надева дека ќе биде постигнат договор со лидерите на ЕУ во врска со неговите планови за реформирање на односите меѓу Лондон и ЕУ пред средбата на врвот на 18 и 19 февруари. Тоа може да го отвори патот кон одржување референдум во Велика Британија за нејзиното членство во Унијата уште во јуни.
Меркел и Камерон се согласни и дека е постигнат напредок по европската средба на врвот минатиот месец и дека постои добра волја во ЕУ да се земе предвид загриженоста на Британците во сите четири сфери.