Средбата меѓу специјалниот претставник на американскиот претседател Стив Виткоф и рускиот претседател Владимир Путин би можела да означи почеток на нова фаза во пристапот на Вашингтон кон украинската криза, а според проценките на Брисел, би можела да доведе и до притисок врз Киев да направи отстапки кон Москва.
Како што објави Гардијан, шефицата на европската дипломатија Каја Калас изрази загриженост дека претстојните дипломатски контакти би можеле да бидат насочени кон „убедување на жртвата“ да попушти.
„Се плашам дека целиот притисок ќе биде насочен кон жртвата, што значи дека Украина ќе мора да направи отстапки и да преземе обврски“, предупреди Каласова, оценувајќи дека таквото сценарио би можело да ја ослаби позицијата на Киев во долготрајниот конфликт.
Портпаролот на Кремљ, Дмитриј Песков, потврди дека Виткоф ќе се сретне со Путин во вторник, 2 декември, попладне. Тој додаде дека рускиот претседател ќе одржи и неколку приватни консултации во текот на денот како дел од подготовките за претстојните руско-американски контакти.
Средбата доаѓа кратко откако САД и Украина одржаа разговори во Флорида за време на викендот. Украинската делегација ја предводеше поранешниот министер за одбрана Рустем Умеров, кој го наследи Андриј Јермак на функцијата шеф на претседателската администрација по големиот корупциски скандал.
Според руските медиуми, на состаноците во Флорида се разговарало за клучни прашања за идната стратегија, очекувањата од Вашингтон и Киев, како и можните модели за понатамошниот процес на преговори. Нивните извештаи укажуваат дека пристапите на двете страни се промениле до одреден степен, што дополнително ја зголемува важноста на мисијата на Виткоф во Москва.
Пред продолжувањето на дипломатските контакти, останува прашањето дали Вашингтон ќе инсистира на забрзано барање компромис или, како што предупредуваат некои европски претставници, ќе се обиде да го префрли товарот на отстапките на Киев.