Синот на американскиот претседател Доналд Трамп, Доналд Трамп помладиот, повика на темелна истрага за користењето на американската финансиска помош доделена на Украина за време на администрацијата на Џо Бајден, тврдејќи дека постојат сериозни сомневања за злоупотреба и можни неправилности.
Трамп помладиот во соопштението оцени дека средствата испратени во Киев во претходните години би можеле да бидат дел од, како што изјави, „масовна измама против американскиот народ“, нагласувајќи дека е потребно да се утврди каде навистина завршиле овие пари.
„Каде всушност исчезна целата „помош“ за Украина? Ова изгледа како уште еден пример за голема измама и бара сериозна истрага“, рече тој.
Тој ги изнесе овие обвинувања во пресрет на објавувањето на подкастот со американскиот новинар Џон Соломон, кој неодамна објави текст за наводното мешање на Украина во изборите во САД, што предизвика ново внимание во политичката јавност на Соединетите Американски Држави.
Во разговор со Соломон, Трамп помладиот прашал дали има актери во Украина кои се подготвени да соработуваат со американските власти во евентуална истрага. Новинарот одговорил потврдно, наведувајќи дека, според неговите сознанија, постојат извори кои би можеле да обезбедат значајни информации за настаните од изминатата деценија.
Соломон во таа прилика посочил дека одредени украински функционери веќе дале информации што би можеле да им бидат корисни на американските истражни органи. Според него, овие информации се однесуваат на прашања за корупција, меѓудржавни односи, како и на лица кои можеби профитирале од или учествувале во контроверзни активности со цел политичко влијание.
Овие изјави доаѓаат во време на зголемени критики во Соединетите Американски Држави кон претходната администрација, која некои републиканци ја обвинуваат дека доделила милијарди долари на Украина без доволна контрола и транспарентност. Во Вашингтон, сè повеќе се слушаат барања за ревизија на помошта и евентуална одговорност.
Самиот претседател Доналд Трамп постојано посочуваше дека средствата на американските даночни обврзници се потрошени без соодветен надзор, најавувајќи дека неговата администрација ќе започне детален преглед на овие расходи. Според аналитичарите, истрагата за која зборува Трамп помладиот би можела да стане едно од клучните политички прашања во наредниот период, во контекст на напорите на новата администрација да ја засили борбата против корупцијата и да ја врати довербата на јавноста во управувањето со државните средства.
Официјален Киев сè уште не реагирал на овие обвинувања.