Израелскиот министер за одбрана Израел Кац го отфрли тврдењето на американскиот претседател Доналд Трамп дека Израел ќе се повлече од Либан.
„Не баравме дозвола од никого да влеземе во Либан, ниту ни треба дозвола да останеме таму“, рече Кац во соопштението, објави „Тајмс оф Израел“.
Кац рече дека е право и должност на Израел да ги брани северните делови на земјата од она што тој го нарече закана од „терористичката група Хезболах, чија цел е уништување на Државата Израел“.
Кац нагласи дека Израел, како што јасно стави до знаење израелскиот премиер Бенјамин Нетанјаху, ќе продолжи да има војници во безбедносната зона во Либан и ќе дејствува по потреба сè додека Хезболах не се разоружа низ целиот Либан и не се отстрани заканата за народот на северен Израел.
Трамп рече дека верува оти Израел ќе се повлече од Либан, иако Нетанјаху и други израелски претставници инсистираа дека израелската војска ќе остане таму сè додека Хезболах не се разоружа целосно.