Израелскиот министер за одбрана Израел Кац повторно ја повика палестинската милитантна група Хамас денес да ги ослободи преостанатите заложници и да го положат оружјето, предупредувајќи дека во спротивно, Газа и групата ќе бидат уништени. Кац рече дека тоа е последно предупредување до Хамас.
„Моќен ураган ќе го погоди небото над Газа денес“, напиша Кац на платформата X.
Кац нагласи дека израелската војска продолжува да ги спроведува своите планови и се подготвува да ги прошири операциите за освојување на Газa.
Израел продолжува со голема офанзива за преземање на градот Газа, каде што околу милион жители се засолниле пред најновите евакуации.
Израелскиот премиер Бенјамин Нетанјаху изјави во неделата дека досега повеќе од 100.000 луѓе се евакуирани од градот Газа.
Израелската војска во последните денови извршува напади врз високи згради во градот Газа откако издаде предупредувања за евакуација, тврдејќи дека зградите ги користи Хамас.