Јеменските сили се судрија со американски воени бродови во Црвеното Море, а американските сили извршија нови воздушни напади на западот на Јемен, објавија денеска иранските медиуми.
Јеменските вооружени сили соопштија дека јеменските ракетни, воздухопловни и поморски сили се судриле со неколку американски воени бродови во северниот дел на Црвеното Море, вклучително и носачот на авиони USS Harry S. Truman, кој лансираше неколку крстаречки ракети и беспилотни летала, јавува иранската државна агенција ИРНА.
Во изјавата, која ја пренесе јеменската телевизија Ал Масира, се наведува дека неколкучасовната операција на јеменските вооружени сили ги „спречила Соединетите Американски Држави да ја прошират својата агресија врз Јемен“.
Нагласено е дека е потврдена непоколебливата поддршка на јеменската влада и нација на угнетениот палестински народ, истакнувајќи дека јеменските вооружени сили ќе продолжат да спроведуваат одмазднички операции против Израел се додека „не престане агресијата и опсадата на окупираната палестинска енклава на Појасот Газа“.
