Поранешниот израелски премиер Бенјамин Нетанјаху има добри шанси да се врати на власт, покажуваат првите излезни анкети по денешните избори. Нетанјаху, кому му се суди за корупција, треба да освои 61 или 62 пратенички места од вкупно 120, покажуваат анкетите на израелската телевизија.
Првите излезни анкети може да се разликуваат од конечните изборни резултати што се очекуваат подоцна во текот на неделата, но раните резултати покажуваат дека десницата помина многу подобро од очекуваното. Во Израел ова беа петти избори за помалку од четири години.
Кампањата беше обележана од екстремно десничарскиот Итамар Бен-Гвир и неговиот ултра-националистички блок Религиозен ционизам, кој најверојатно ќе биде третата по големина партија со 15 места во парламентот. Пребегнувањата од владејачката коалиција на премиерот Јаир Лапид беа исто така важни, а најважните работи за гласачите беа безбедноста и зголемувањето на цените.
Нетанјаху (73) смета на поддршката на Бен-Гвир и на екстремно десничарскиот сојузник Безалел Смотрич.
Изгледите Бен-Гвир, поранешен член на Кач, група на терористичките листи на Израел и САД, да влезе во владата ги загрижува сојузниците, вклучително и Вашингтон.