Централната команда на САД (CENTCOM) го предупреди Пентагон дека противниците користат комерцијално достапни податоци за локација за следење и потенцијално таргетирање на американскиот персонал во воените зони.
Во писмото што го сподели со Ројтерс сенаторот Рон Вајден на 14 април се вели дека CENTCOM добил повеќекратни извештаи дека Иранците ги експлоатираат комерцијалните податоци за локација за следење на американскиот персонал на терен. Не се дадени дополнителни детали, но областа на операции на CENTCOM го вклучува Заливот, каде што американските сили се соочуваат со иранската војска над Ормутскиот теснец.
Вајден и двопартиска група пратеници велат дека ова е прва официјална потврда дека американските сили биле цел во активна воена зона врз основа на комерцијално достапни податоци.
Во писмо до Пентагон, тие предупредија дека таквите податоци можат да се користат за откривање на местата за собирање на војниците и нивните дневни модели на движење, што може да им помогне на противниците во напади со ракети, беспилотни летала и импровизирани експлозивни направи, но и во контраразузнавачката работа.
Пентагон соопшти дека ќе одговори директно на пратениците, без понатамошно разјаснување. Пратениците велат дека претходните обиди да се добијат повеќе информации од воените претставници биле неуспешни.
Рекламите базирани на локација долго време предизвикуваат загриженост за приватноста, бидејќи апликациите и давателите на услуги собираат податоци од паметни телефони и други уреди, а потоа ги продаваат на посредници кои ги препродаваат. Пратениците сега се залагаат за побрзи заштитни мерки, вклучително и исклучување на рекламните идентификатори на официјалните уреди, автоматско исклучување на споделувањето локација на телефоните во зоната на распоредување и отфрлање на прелистувачот Google Chrome во корист на поприватни алтернативи.
Републиканскиот конгресмен Пет Хариган, поранешен офицер на специјалните сили на американската армија и еден од потписниците на писмото, рече дека прелистувачите како Chrome се „изградени од темел за собирање и споделување на кориснички податоци“. Хариган додаде дека секој ден кога тие остануваат на владини уреди е уште еден ден кога им предаваме оружје на нашите противници против нашите сопствени војници.“