Иран им порача на САД дека Израел треба да очекува последици поради нападот на дел од Голенската Висорамнина, кој е под сириска контрола, извршен на 18 јануари кога беше убиен иранскиот генерал Мухамед Али Алахдади, изјави денеска иранскиот заменик-министер за надворешни работи Хусеин Амир Абдулахиан.
– Им испративме порака на САД преку дипломатски канали дека ционистичкиот режим ја премина иранската црвена линија со таа акција. Во таа порака им кажавме дека одговорните треба да очекуваат последици од таквиот чин, истакна Абдулахиан за иранската новинска агенција ИРНА.
Минатата недела иранскиот бригаден генерал Хусеин Дехкан упати закани кон Израел, потенцирајќи оти акцијата на Голенската Висорамнина нема да остане без одговор.
Според претходни израелски безбедносни извори иранскиот генерал не бил мета на нападот врз конвојот на Голенската Висорамнина и оти Израелците мислеле дека напаѓаат герилци од понизок ранг.
Израел повеќе пари ја нападна Сирија од почетокот на граѓанската војна, пред се уништувајќи оружје, пред се ракети, за кои израелските власти веруваат дека се наменети за Хезболах. Проиранската организација се бори на страната на сирискиот претседател Башар ал Асад.