Техеран се подготвува да возврати откако Израел денес започна напад врз Иран, а одговорот ќе биде „разорен“, изјави ирански функционер за Ројтерс.
Три експлозии се слушнаа во централен Иран, објави новинската агенција Фарс. Експлозии се слушнаа и на север и исток од Техеран, како и во Исфахан, Карај и Керманшах.
Израелскиот министер за одбрана Израел Кац претходно изјави дека Израел започнал превентивен напад врз Иран за да ги отстрани заканите за безбедноста на земјата и дека е прогласена вонредна состојба низ целата земја.
„Државата Израел започна превентивен напад врз Иран со цел да ги отстрани заканите за Државата Израел. Сегашната вонредна состојба е прогласена низ целата земја“, рече тој, објави „Тајмс оф Израел“.
Според израелски безбедносен извор, тековниот напад е заедничка американско-израелска операција и бил планиран со месеци однапред, изјави неименуван израелски функционер за Ројтерс.
Тој рече дека датумот на нападот е одреден пред неколку недели.