Иран и Оман постигнаа договор за начинот на транзит низ Ормускиот теснец, како и за поделбата на приходите поврзани со поморскиот сообраќај, соопшти портпаролот на иранската Исламска револуционерна гарда (IRGC).
Според иранската страна, двете земји постигнале договор за уделот на секоја од нив во водите на теснецот, како и за распределбата на приходите. Од IRGC велат дека е постигнато решение кое е прифатливо за двете страни.
Договорот следува по околу 40 дена разговори меѓу Техеран и Маскат. Иранскиот заменик-министер за надворешни работи Казем Гарибабади изјави дека двете земји преговарале за привремена шема за транзит низ Ормутскиот теснец и постигнале договор за рута широка околу седум милји, односно околу 11 километри.
Според Гарибабади, влезната точка и дел од излезната рута минуваат низ иранските територијални води. Предложената карта за движење низ теснецот била изработена од иранските вооружени сили, а во следниот период треба да продолжат разговорите за постигнување траен договор.
Иранските власти нагласија дека договорот со Оман не значи целосно „отворање“ на Ормутскиот теснец. Станува збор за привремена рамка со која треба да се регулира транзитот и да се овозможи контролирано одвивање на поморскиот сообраќај.
Министерствата за надворешни работи на Иран и Оман претходно објавија заедничко соопштение во кое наведоа дека разговарале за „привремена рамка“ за управување со Ормутскиот теснец.
Иранската страна тврди дека САД се обидувале да ги попречат разговорите меѓу Техеран и Маскат, поради што преговорите биле одложувани. И покрај тоа, според Иран, двете страни успеале да постигнат договор.
Ормутскиот теснец има огромно значење за глобалната економија бидејќи низ него минува значителен дел од светската трговија со нафта и други енергенси. Секое ограничување на пловидбата низ овој тесен поморски коридор може да предизвика сериозни последици за глобалните пазари на енергенси и да влијае врз цените на нафтата.
Затоа договорот меѓу Иран и Оман има значење не само за двете земји, туку и за меѓународниот поморски и енергетски сообраќај. Сепак, бидејќи станува збор за привремена рамка, останува да се види дали Техеран и Маскат ќе успеат да постигнат и долгорочен договор за управувањето со транзитот низ Ормутскиот теснец.