Меѓународната организација за миграции (ИОМ) соопшти денеска дека во првите шест недели од оваа година, 409 лица се удавиле во Средоземното Море во обид да дојдат до подобар живот во Европа, што е речиси десет пати повеќе во однос на истиот период минатата година.
Во соопштението на ИОМ се наведува дека во исто време, од 1 јануари досега, 76.000 луѓе успеале да стигнат до Европа по морски пат, што е речиси 2.000 луѓе на ден.
Од вкупно 409 смртни случаи, над три четвртини луѓе се удавиле на краток пат меѓу Турција и Грција, каде до актуелната бегалска криза вакви несреќи имало значително помалку во однос на многу подолга морска рута од Либија до Италија.
Несреќи со давење на бегалци се случуваат речиси секојдневно, па така турската крајбрежна стража вчера соопшти дека 27 имигранти загинале кога нивниот чамец се превртел во обид да дојдат до грчкиот остров Лезбос.