Индонезиските фискални и монетарни власти денеска соопштија дека се подготвува сет прописи со цел да се закочи темпото на пораст на задолжувањата на државата и приватниот сектор со странски капитал. Во последните пет години процентот на задолжувањата во Индонезија пораснал од 21 на 46,5 посто од вредноста на вкупниот инонезиски извоз.
Во мај годинава, висината на обврските кон странските финансиери изнесувала 283,7 милијарди долари. Над 60 посто од долгот е на приватниот сектор.
Мерките за ограничување на задолжувањата најмногу ќе ги погодат компаниите што се во сопственост на државата. Единствено компаниите од областа на енергетскиот сектор нема да бидат лимитирани за висината на позајмувања од странство.