Израелските одбранбени сили (ИДФ) објавија дека еден од основачите и организаторите на Хамас на нападот врз Израел од 7 октомври 2023 година е убиен во воздушен напад во градот Газа.
Во соопштението се наведува дека убиениот Хакем ал-Иса бил главен командант на дивизијата за борбени операции и административна поддршка на военото крило на Хамас.
Се наведува дека тој бил убиен синоќа во напад врз населбата Сабра во градот Газа, објави „Тајмс оф Израел“.
Според соопштението, Иса бил „клучна фигура и еден од последните високи оперативци на Хамас кои држеле високи позиции пред нападот од 7 октомври и останале во Појасот Газа“.
„Во минатото, Иса го водеше зајакнувањето на силите на Хамас во Појасот Газа и беше еден од основачите на оперативната дивизија на военото крило, а беше и раководител на дивизијата за обука, како и член на генералниот воен совет на движењето“, соопшти ИДФ.
Иса, исто така, одигра „значајна улога во планирањето и извршувањето на масакрот од 7 октомври 2023 година“, се вели во соопштението.
Израелската војска додаде дека за време на војната и во најновиот период, Иса работел на подготовка на терористички напади од воздух и море против израелски цивили и персонал на ИДФ во Појасот Газа.
„Иса, исто така, работел на обнова на редовите на Хамас кои претрпеа загуби за време на војната“, се вели во соопштението.