Иванка Трамп, ќерката на поранешниот американски претседател Доналд Трамп, и нејзиниот сопруг Џаред Кушнер го напуштиле Вашингтон и заминале за Мајами, каде рентаат луксузен апартман, објави денеска Си-ен-ен, повикувајќи се на свои извори.
Според извештајот, Иванка во Мајами изнајмила апартман во луксузен станбен комплекс на брегот на Атлантскиот Океан со договор на една година. Телевизијата посочува дека месечната кирија на таква недвижност е во висина од 40.000 долари.
Иванка е сопственичка на имот на елитниот остров-населба Индијан Крик во близина на брегот на Флорида, каде што таа наводно планира да изгради дом.
Иванка и нејзиниот сопруг Кушнер официјално држеа советнички места во кабинетот на досегашниот американски претседател.
Претходно, на Флорида заминаа и самиот Трамп со сопругата Меланија, сега веќе екс-првата дама на САД.
Американските медиуми известија дека по излегувањето од авионот „Ер Форс Уан“, Меланија сама продолжила кон влезот на аеродромот без да му се придружи на сопругот.