Шефот на британска дипломатија Филип Хамонд денеска го обвини рускиот претседател Владимир Путин дека се однесува како тиранин во однос на Украина, додавајќи оти силите на Киев не можат да ја победат армијата на Русија на бојното поле и само политичко решение може да го спречи крвопролевањето.
– Украинците не можат да ја победат руската армија, тоа не е практична задача. Треба да има политичкко решение. Тој човек (Путин) испрати војска преку меѓународна граница и окупира територија на друга држава во 21 век, дејствувајќи како некаков тиранин од средината на 20 век. Цивилизираните држави не прават така, посочи Хамонд.
Коментарите на Хамонд уследија еден ден откако германската канцеларка Ангела Меркел изјави дека испраќањето оружје за Украина за борба против сепаратистите нема да ја реши кризата. Поради тоа Меркел беше критикувана од американските политичари.
Хамонд наведе дека Велика Британија не планира да ги вооружува украинските сили и оти ќе се фокусира на дипломатските напори за решавање на кризата.