Палестинската екстремистичка група Хамас ги повика земјите-посредници да извршат притисок врз Израел за да им дозволат на десетици нејзини борци да ги напуштат тунелите во кои се држат како заробеници во Појасот Газа.
Ова е првпат исламистичката група јавно да признае дека некои од нејзините борци се заробени во тунелите.
Барањето дојде откако израелската војска минатата недела објави дека убила повеќе од 20 членови на Хамас „кои се обидувале да избегаат од подземната терористичка инфраструктура во областа“ и уапсила осум од нив.
„Го сметаме (Израел) целосно одговорен за животите на нашите борци и ги повикуваме медијаторите веднаш да дејствуваат за да извршат притисок и да обезбедат нашите синови да можат да се вратат дома“, се вели во соопштението на Хамас.
Веќе неколку недели, израелските медиуми објавија дека помеѓу 100 и 200 членови на Хамас се заробени во мрежа од тунели под градот Рафа, во Појасот Газа под израелска воена контрола.
Според договорот за прекин на огнот постигнат со посредство на САД, кој стапи на сила на 10 октомври, израелската армија мора да се повлече од крајбрежниот дел на палестинската територија, зад „жолтата линија“ што ја означува областа под израелска контрола.
Во ноември, на деловна конференција во Мајами, американскиот специјален претставник Стив Виткоф алудираше на „200 борци заробени во Рафа“, сугерирајќи дека нивното предавање би можело да биде „тест“ за Израел и Хамас за спроведување на прекин на огнот.
Сепак, Израел не изгледа подготвен да направи компромис за решение што би им овозможило безбедно да поминат низ тунелот.
Портпаролот на израелската влада изјави за АФП во ноември дека премиерот Бенјамин Нетанјаху „нема да дозволи безбедно поминување на 200 терористи на Хамас“ и останува „цврст во својата намера да ги демонтира воените капацитети на Хамас и да го демилитаризира Појасот Газа“.