Најмалку 30 пекиншки таксисти се обиделе да се убијат пиејќи отровни хемикалии, во знак на протест поради владините мерки во врска со возењето такси, но никој од нив не е во животна опасност.
Таксистите, кои се обиделе да извршат групно самоубиство, се пронајдени онесвестени на еден паркинг пред трговски центар во Пекинг, а на некои од нив им излегувала пена од устата.
Фотографиите, објавени на социјалните мрежи ја прикажуваат оваа сцена и група зачудени граѓани, кои набљудуваат зад полицискиот кордон.
Таксистите, покрај кои се пронајдени шишиња со пестициди, се сместени во болница и никој од нив не е сериозно повреден.
Сите таксисти, кои учествувале во овој инцидент се од североисточната покраина Хеилонџанг, која се граничи со Русија и не работеле за официјални такси компании, туку во договор со локалните власти.