Федералните единици на Германија наредната година планираат да потрошат најмалку 17 милијарди евра за потребите на бегалците, пренесува весникот „Ди Велт“.
Според истражувањето спроведено меѓу министрите за финансии германските покраини ќе потрошат повеќе отколку што владата во Берлин потрошила за образование и наука за 2015 година.
Оваа година државата од буџетот издвоила околу 15, 3 милијарди евра за научни истражувања и процесот на образование. Според проценките на весникот трошоците за бегалците на федералните држави најверојатно ќе бидат и повисоки од 17 милијарди евра затоа што нивната проценка на трошоците е направена за бројка од 800 илјади бегалци а до крајот на Ноември вкупниот број на мигранти се искачи до 965 илјади.
Политиката на отворени врати за бегалците која што ја заговара канцеларката Меркел годинава Германија ја чини повеќе од 6 милијарди евра. Со оглед на тоа што една третина од еден милион новодојдените баратели на азил се деца, само за обезбедување на настава за околу 325 илјади ученици бегалци се вработени 8,500 а треба да бидат вработени уште најмалку 20 илјади наставници.