Германските истражители открија докази кои покажуваат дека проукраинска група ги саботирала гасоводите Северен тек минатата година, објавија локалните медиуми во вторникот.
Групата, составена од пет мажи и една жена, отпатувала во северниот град Росток во септември 2022 година, изнајмила јахта користејќи лажни пасоши и ги саботирала гасоводите „Северен тек“, објави националната телевизија АРД.
Јахтата користена во операцијата била изнајмена од компанија со седиште во Полска, која очигледно била во сопственост на двајца Украинци, според истражителите.
Се верува дека групата се состоела од двајца нуркачи, двајца помошници, еден капетан и еден лекар.
Осомничените користеле професионално фалсификувани пасоши, а германските власти се уште не можеле да го потврдат нивниот вистински идентитет и националност.
Инспекторите при вештачењето пронашле траги од експлозив во кабината на јахтата.
Гасоводите „Северен тек“ беа саботирани во септември минатата година, а експлозиите предизвикаа голема штета на гасоводите што ги поврзуваат Русија и Германија преку Балтичкото Море.