Британскиот весник „Гардијан“ денеска објави дека повеќе нема да објавува свои написи и други прилози на платформата Икс (Твитер), која е во сопственост на најбогатиот човек во светот, Илон Маск.
„Ова е нешто за што размислуваме веќе некое време, со оглед на често вознемирувачката содржина промовирана или пронајдена на платформата X, вклучувајќи ги и екстремно десничарските теории на заговор и расизмот“, вели Гардијан.
Според нив, кампањата за претседателските избори во Соединетите Американски Држави покажала дека Х е „токсична медиумска платформа“ и дека нејзиниот сопственик Илон Маск успеал да го искористи своето влијание за да го обликува политичкиот дискурс.