Агенцијата на Европската унија за заштита на границите на Фронтекс соопшти денеска дека минатата година се регистрирани 1,83 милиони нелегални преминувања на надворешните граници на ЕУ.
Тоа е над седум пати повеќе од преминувањата регистрирани во 2014 година, чија бројка изнесувала 238.500.
Реалниот број на мигрантите е помал, бидејќи некои од нив повеќе пати ги преминувале надворешните граници на ЕУ, нагласи Фронтекс, чие седиште е во Варшава.
Според Фронтекс, само во Грција и Италија лани пристигнале 1,04 милиони мигранти, пет пати повеќе од претходната година. Во декември минатата година на грчка територија пристигнале околу 108 илјади нелегални имигранти, а во ноември 150 илјади.
Министрите за внатрешни работи на земјите од ЕУ в понеделник во Амстердам ќе имаат неофицијална средба, на која ќе се дискутира дали да биде воведена дополнителна контрола на границите на Шенген зоната.