Данската премиерка Мете Фредериксен оцени дека европските земји сè уште не се подготвени за евентуален воен конфликт со Русија, иако, како што изјави, во последните години станале посвесни за безбедносните ризици.
– Ситуацијата е подобра отколку што беше пред неколку години и подобро разбираме што е во прашање. Но, дали сме подготвени? Не мислам така, изјави Фредериксен во интервју за полскиот весник „Газета Виборча“.
Според неа, Русија се „подготвува за напад“ врз Европа, додека европските земји продолжуваат да се однесуваат како да живеат во мирновременски услови.
„Мировното време повеќе не е опција“, рече данската премиерка.
Таа оцени дека земјите од Европската Унија не ги зајакнуваат своите воени капацитети доволно брзо. Иако трошоците за одбрана се зголемуваат, Фредериксен смета дека тоа не е доволно во однос на обемот на предизвиците со кои се соочува Европа.
Данската премиерка ја поддржа оценката на Вашингтон дека Европа направила премалку во областа на одбраната во последните години. Таа го нарече намалувањето на воените трошоци и потпирањето на САД како главен гарант на европската безбедност грешка.
„Европа мора значително да го зголеми својот воен потенцијал до 2030 година. Ова е клучно прашање за европскиот идентитет“, нагласи Фредериксен.
Претходно, претседателот на Воениот комитет на НАТО, адмиралот Џузепе Каво Драгоне, изјави дека Алијансата е во процес на долгоочекувана и неопходна промена, која ја оцени како корисна за иднината на западниот воен сојуз.