Стотици демонстранти трета ноќ по ред излегоа на улиците на Белфаст и предизвикаа судири со полицијата и покрај повиците за разумност од страна на премиерот на Северна Ирска Питер Робинсон.
Во насилствата е повреден еден полицаец. Демонстрантите фрлале молотови коктели и различни предмети врз полицијата, која одговори со гумени куршуми.
– Многу е важно да запре насилството. Треба да се зачува ладнокрвноста во овие услови и се надевам дека луѓето ќе ги слушнат повиците да се воздржат од насилство. Единствениот дозволен начин е мирно и законски да се протестира, изјави премиерот Робинсон.
Насилството започна во петокот вечерта, кога полицијата се обиде да ги спречи демонстрантите да влезат во квартот населен со католици и да не дозволат судири. Во првата ноќ од протестите беа повредени 32 полицајци, а еден политичар беше погподен во главата со тула.
Ноќта меѓу саботата и неделата беа повредени седум полицајци, кои биле нападнати од демонстранти со молотови коктели.
Околу илјада полицајци од Англија и Велс беа ангажирани за го спречат насилството, кое секоја година ја обележува парадата на 12 јули, која е најважна манифестација на протестантскиот Ред на Портокаловите и традиционално се организира во Северна Ирска од април до август.
Католиците во денешна Северна Ирска се против овие маршеви, за кои сметаат дека се навредливи за нивната заедница.
Триесет годишното насилство на верска основа во Северна Ирска однесе 3.500 животи.