Американски конгресмени по потекло од Грција и Израел, и претставниците на двете заедници во САД, формираа нова група, наречена Конгресна хеленско-израелска алијанса, чија цел ќе биде да работи на односите меѓу Грција, грчкиот дел на Кипар и Израел.
Групата формирана од конгресмените од Флорида, републиканецот Гас Билиракис и демократот Тед Дојч, а под покровителство на амбасадорите
на Израел, Грција и Кипар во САД, јави дописникот на МИА од Вашингтон.
Трите земји работат на засилување на меѓусебните односи, како противтежа на Турција во регионот, а со цел во САД да се промовираат проектите за развој на наоѓалиштата на нафта и гас во Средоземно Море јужно од Кипар и западно од Израел.
Кипарските власти прогласија ексклузивна економска зона и бараат заедничка експлоатација на наоѓалиштата со израелските компании кои работат на наоѓалиштето Левијатан, но Турција се противи на едностраните чекори од страна на Кипар.
– Стратегиската положба на Грција, Кипар и Израел, нашите природни ресурси и интелектуален капитал водат до природно партнерство во економските, енергетските и анти-терористичките активности во Блискиот Исток и Европа, изјави конгресменот Билиракис, кој е со грчко потекло.
Покрај Билиракис и Дојч, во групата засега се приклучени демократскиот конгресмен од Њујорк Елиот Енгел кој долги години е активен на балканските прашања, и демократскиот конгресмен Бред Шнајдер.