„Фајзер“ сè уште не доставил до Европската унија околу 10 милиони дози вакцини против Ковид-19, што требаше да ги испорача во декември, што е околу 30 проценти помалку од планираното, соопштија европските власти.
До средината на минатата недела, „Фајзер“ достави 23 милиони дози од вакцината што ја разви со германската компанија „БиоНТек“ до Европската унија, изјави европски службеник кој е директно вклучен во преговорите со американската компанија.
Тоа е околу 10 милиони дози помалку отколку што компанијата вети дека ќе ги испорача до средината на февруари, рече друг службеник, кој исто така е вклучен во преговорите.
„Фајзер“ одби да ги коментира информациите, објаснувајќи дека тоа е деловна тајна.
Европската комисија исто така не даде коментар.
Европските официјални лица изјавија дека „Фајзер“ ветил дека ќе испорача 3,5 милиони дози од вакцината седум дена по почетокот на јануари или вкупно 21 милион дози до средината на февруари.
Вакцините на „Фајзер/БиоНТек“ беа одобрени за употреба во Европската унија на 21 декември.
ЕУ има два договора со „Фајзер“ за испорака на 600 милиони дози од вакцината.
Европската комисија ги одобри сите барања за извоз на вакцини против Ковид-19, претежно на „Фајзер“.
Од 30 јануари до 16 февруари одобрени се 57 апликации за извоз во 24 земји, вклучувајќи ги Велика Британија и Обединетите Арапски Емирати, изјави портпарол на Комисијата.