Европските разузнавачки служби планираат да ја зајакнат својата борба против исламистичките борци, создавајќи виртуелна мрежа за споделување информации меѓу 30 држави.
Групата за борба против тероризмот – неформална мрежа на службите за внатрешно разузнавање на 28-те земји членки на ЕУ, Норвешка и Швајцарија, има за цел до 1 јули да создаде нова платформа.
Нападите во Европа кои беа извршени минатата година поттикнаа соработка меѓу разузнавањата на одделни држави.
Директорот на германската служба за внатрешно разузнавање Ханс-Георг Маасен изјави денеска дека „терористичките напади во Европа, како и неодамнешните во Франција, покажуваат дека ИД и Ал Каеда дејствуваат во меѓународни мрежи“.
Директорот на холандската Генерална служба за информација и безбедност Роб Бертоле истакна дека платформата ќе ги опфати „странските борци и заканата, која ја претставуваат тие и нивните соучесници“.