Поради руската инвазија на Украина, Европската унија ги блокираше средствата и резервите на руската централна банка во вредност од над 200 милијарди евра.
Бројката се базира на извештаите на земјите-членки на ЕУ доставени до Европската комисија, изјави денеска во Брисел портпаролот на ЕК. ЕУ ги замрзна средствата на руската централна банка како дел од санкциите наметнати на Русија поради нејзината инвазија на Украина.
Забранети се сите трансакции поврзани со управувањето со резервите и средствата на руската централна банка, која поради тоа повеќе нема пристап до нејзините средства во централните банки и приватните институции во Европската унија, потсетува ДПА.