Четиринаесет лица, главно руски државјани, се уапсени во Шпанија и Португалија под сомнение дека се членови на криминална организација која обезбедувала услуги за перење пари на други криминални мрежи со седиште во Европската унија, соопшти денеска Европол, кој ја поддржуваше прекуграничната операција.
Според извештаите, за време на полициските операции и претреси на куќи во Мадрид, Малага, Марбела, Торемолинос, Коин и Ајамонте во Шпанија, како и Лисабон во Португалија, запленети се повеќе од еден милион евра во готовина и криптовалути.
„Истражниците веруваат дека бандата вршела дневни трансакции во готовина, кои на моменти достигнувале и до 300.000 евра дневно“, се вели во соопштението на Европол.