Голем број пожарникари се борат против неколку пожари кои дивеат во руралните делови на Северна Калифорнија, поради што беше наложена и евакуација на тамошното население. Пожарите се активни во близина на Сан Франциско.
Неколку масивни пожари се надвор од контрола во окрузите Напа и Сонома, уништувајќи, засега, непознат број домови и бизниси и принудувајќи на евакуација илјадници лица. Поради пожарите затворени се главните патишта, во обид пожарникарите да ги стават под контрола огновите, кои се шират поради силниот ветер. Поради пожарот евакуирани се и две болници во Санта Роса.
Очевидци раскажуваат дека огнот ги истерал од нивните домови насред ноќ и оти биле принудени да бегаат за да го заштитат својот живот. Центри за евакуација веднаш се поставени, но американските медиуми известуваат дека нивните капацитети веднаш се полнат.