Лидерите на 27-те земји членки, кои ќе останат во Европската унија по заминувањето на Велика Британија, на Самитот во Брисел одлучија да започнат подготовки за втората фаза од преговорите за Брегзит.
Ова го најави претседателот на Европскиот совет Доналд Туск на Твитер.
– Заклучоците за Брегзит се прифатени. Лидерите даваат зелено светло за почеток на подготовките на втора фаза, напиша Туск.
Дваесет и седумте шефови на држави и влади информираа дека во декември ќе дадат нова оценка дали има доволен напредок во клучните прашања, со што ќе се дозволи преговорите да преминат кон разгледување на идните односи меѓу ЕУ и Велика Британија.
Британската премиерка Тереза Меј изјави дека ги уверила колегите од ЕУ оти Велика Британија ќе ги исполни обврските кон Унијата поврзани со Брекзит.