Спасувачката служба денеска пронашла тело во урнатините на две згради во центарот на Лил на северот на Франција, соопштија локалните власти.
Се претпоставува дека се работи за телото на исчезнатиот 45-годишен лекар кој живеел во една од двете згради кои се урнаа во саботата.
Двете соседни згради се урнаа во прометна улица во центарот на Лил. Жителите биле евакуирани во текот на ноќта како мерка на претпазливост откако еден од жителите пријавил сомнителни пукнатини.
Една од урнатите згради била на три ката и во фаза на реновирање. Кога се урнала, ја повлекла и соседната зграда.
Инцидентот се случил пред дуќаните на шопинг улицата да почнат со работа.
Локалното обвинителство отвори истрага, додека заменик министерот за станбени прашања Оливие Клајн утре ќе го посети местото на несреќата.