Претставничкиот дом на американсиот Конгрес ќе направи се што е можно за да го спречи договорот за нуклеарната програма на Иран, изјави неговиот претседател, републиканецот Џон Бејнар.
На 14 јули Иран и шестте светски сили (петте постојани членки на СБ на ОН и Германија) постигнаа историски договор за нуклеарната програма на Техеран.
Американскиот претседател Барак Обама неодамна изјави дека историскиот договор со Иран „не е изграден врз доверба, туку е изграден врз верификација“.
Тој додаде дека сите ирански патишта кон нуклеарното оружје се пресечени врз основа на одредба од договорот. Американскиот претседател изјави дека Иран ќе отстрани две третини од своите инсталирани центрифуги и 98 отсто од своите резерви на ураниум.
Во замена за тоа, тврди тој, на Иран ќе му бидат етапно ублажувани санкциите, додека ги исполнува одредбите од договорот.
Обама се закани со ставање вето на секој предлог од Конгресот кој би го блокирал спроведувањето на договорот. Тој оцени дека без договор „поголеми се шансите за нова војна“ на Блискиот Исток.