Американскиот претседател Доналд Трамп не верува дека Русија треба да биде економски изолирана од остатокот од светот, освен во контекст на војната против Украина, изјави потпретседателот Џ.Д. Венс во објавено интервју. Венс го кажа ова за „One America News Network“, пишува „Kiev Independent“.
Оваа изјава доаѓа во време кога администрацијата на Трамп, и покрај повторените закани, воведе само ограничени санкции против Русија, а во некои случаи ги ублажи постојните ограничувања.
„Претседателот беше многу отворен со Европејците и Русите дека не гледа причина зошто треба економски да ја изолираме Русија освен заради продолжување на конфликтот“, рече Венс.
Потпретседателот нагласи дека Русија сè уште претставува суперсила богата со ресурси.
„Да бидеме искрени, без разлика дали ви се допаѓа Русија или не, без разлика дали се согласувате со нивните фундаментални аргументи за конфликтот или не, едноставен факт е дека тие имаат многу нафта“, рече Венс, додавајќи: „Тие имаат многу гас. Тие имаат многу минерално богатство“.
Според него, по постигнувањето на мировен договор, Вашингтон би можел да воспостави „многу продуктивен економски однос“ и со Киев и со Москва.
Коментарите на Венс се совпаднаа со извештаите дека мировните предлози на Трамп наводно вклучуваат укинување на санкциите врз Москва. Ова предизвика загриженост во Киев и Брисел за можното губење на западното влијание врз Кремљ.
Американскиот министер за енергетика Крис Рајт изјави завчера дека Европа мора да ги намали купувањата на руска нафта и гас ако очекува Вашингтон да ги зголеми санкциите со цел да ја охрабри Москва да се вклучи во сериозни преговори.
Во текот на август, Вашингтон воведе царини за Индија, еден од најголемите купувачи на руска нафта, но се воздржа од пообемни мерки. Индиските претставници изјавија дека царините нема да го спречат увозот на руска сурова нафта.
Од друга страна, претседателот на Европскиот совет, Антонио Коста, на 5 септември објави дека европска делегација ќе отпатува во Вашингтон за да координира нов заеднички пакет санкции. Еден ден подоцна, американскиот министер за финансии Скот Бесент ја потврди подготвеноста на Вашингтон да ги прошири секундарните царини на земјите што купуваат руска нафта, иако конкретни чекори сè уште не се објавени.