Двајца полицајци се повредени денеска во напад со нож на улица во центарот на Лондон, а напаѓачот е уапсен, соопшти полицијата.
Нападот се случил на плоштадот Лестер, каде има многу туристи, но не во близина на Вестминстерската сала, каде илјадници луѓе чекаат на ред да и оддадат почит на кралицата Елизабета Втора, јавува АП.
Полицијата соопшти дека нејзини припадници „налетале на маж со нож“ и дека двајцата полицајци се во болница каде се чекаат информации за нивната состојба.
И напаѓачот по апсењето е во болница, а се сомничи дека нанел тешка телесна повреда и нападнал службено лице.
Полицијата ги истражува околностите на овој напад.