Италија во иднина мора помалку да се потпира на увозот на гас од Русија, изјави денеска премиерот Марио Драги и најави зголемен увоз на течен гас од САД.
Од говорницата на италијанскиот парламент тој предупреди на намаленото домашно производство на гас. – Настаните од деновиве покажуваат дека бевме несовесни бидејќи во изминатите децении не ги проширивме нашите извори на енергија и снабдувачите, оцени Драги.
– Рускиот удел во италијанскиот увоз на гас е 45 отсто додека домашното производство е намалено, нагласи италијанскиот премиер. Италија планира да го зголеми увозот на течен природен гас од САД, рече Драги, заблагодарувајќи му се на американскиот претседател Џо Бајден за помошта. – Рим, исто така, се обидува да го зголеми увозот од Азербејџан, Алжир, Тунис и Либија, додаде тој.
Италијанската енергетска компанија Ени минатата недела соопшти дека сè уште има резерви на природен гас во својата земја и е подготвена да го зголеми производството доколку е потребно.
Драги смета дека капацитетите за складирање гас треба да се подобрат и ја повика Европската унија да развие заеднички механизми за складирање.
Тој, исто така, предупреди дека можеби ќе треба повторно да ги отворат електраните на јаглен за да ги решат краткорочните проблеми со снабдувањето и да го ублажат влијанието на зголемените цени на енергијата врз домаќинствата и бизнисите.
Извор: МИА