Европската Комисија се заложи да даде нови 113 милиони евра хуманитарна помош за Авганистанците, вклучително и раселените лица.
Заложбата во име на Европската Комисија ја даде комесарот за хуманитарна помош, Јанез Ленарчич за време на Конференцијата за Авганистан.
Средствата се наменети за медицинска нега, исхрана, образование, засолниште и заштита на цивилите.
Од овие 113 милиони евра 18 милиони одат за Пакистан и Иран кои примаат бегалци од Авганистан.
– Авганистан продолжува да се соочува со една од најстрашните хуманитарни кризи во светот. По студената зимска сезона, милиони жени, мажи и деца се борат со акутен глад. Сакам да им се заблагодарам на владите на Германија, Катар и Обединетото Кралство, како и на Обединетите Нации за здружување на силите да се организира оваа конференција навремено. ЕУ е целосно солидарна и ќе продолжи да ги поддржува ранливите авганистански бегалци и заедници кои ги примаат во Иран и Пакистан, изјави Ленарчич.
Извор: МИА