Циклонот Махасен, кој се приближува кон Бангладеш и Мјанмар ослабнува, но се уште претставува закана за над осум милиони лица во регионот, соопшти Координативното биро на ОН за хуманитарни прашања.
Се очекува циклонот да го погоди крајбрежјето на Бангладеш во четврток. Властите наредија евакуација на стотици илјади локални жители од ниските зони на земјата, изјави Мохамед Абдула од управата на вториот по големина град Читагонг.
Според координативното биро на ОН за хуманитарни прашања циколонот претставува закана за речиси 8,2 милиони луѓе во Североисточна Индија, Бангладеш и Мјанмар.
Голем дел од Бангладеш се наоѓа на морското ниво и земјата често е цел на смртоносните циклони. Во 2007 година циклонот Сидр однесе 3.300 жртви во Бангладеш, а над 800 исечзнаа.
Во 2008 година циклонот Наргис погоди дел од Мјанмар, по што загинаа над 130 илјади лица.